Өлеңдер ✍️

Барымды кидім, жарымды сүйдім,
Қызығын көрдім құрмет пен сыйдың,
Тіліне ердім жүрек пен мидың,
Жақсының сөзін көңілге түйдім,
Шүкірлік қылған кез де бар!
Кей жерде терең теңіздей тастым,
Ернеуге сыймай, арнадан астым,
Баспайтын жерді бірнеше бастым,
Асып та састым, пәледен қаштым,
Тоқтамай қойды сөзге олар.
Бақ берген Алла тақ бермеді деп,
Маңдайға тайқы тап келмеді деп,
Киімім киген шақ келмеді деп,
Аз болып қалды, көп бермеді деп,
Күпірлік қылған кез де бар!
Бойыңда, бірақ, қайратың болса,
Астыңда мінер жайлы атың болса,
Жасқантар жауды айбатың болса,
Дегенің болса, көңілің толса,
Өлімнен басқа тез болар.