Өлеңдер ✍️

Кедей жүр бағым жанса бай болам деп,
Байлар жүр Құдайға да сай болам деп,
Тұқым жоқ, тұқым болса, күтімі жоқ,
Жер үшін жаға жыртар байбалам көп.
Шамасы аз болса да егін сеппек,
Қазақты кім айтады еріншек деп?!
Қалтада ақшасы бар, басқасы бар,
Жеріңді игермей ме келімсек кеп.
Қара жер қазына ғой баға жетпес,
Жер үшін төккен терің текке кетпес.
Сол жерді ту-талақай қылғандарға
Қанша айқай салсаң-дағы, сөзің өтпес.
Менің де басылмайтын бар-ау шөлім,
Даламның ұлымын деп санаушы едім.
Саудагер бидай сатқан толып жатыр,
Алқаптың кім жұлады арам шөбін?!
Жайқалған гүлдері де, орманы да,
Жеміс пен жусаны да, қаңбағы да,
Жас күннен көзге жылы ұшырайтын
Жер – бізге бабамыздан қалған мұра.
Өмірдің құжынаған илеуіндей,
Тірліктің шеше алмайсың күрмеуін кей.
Қарағым!
Қара жерді жамандама,
Қадірін түсінбейсің көрге кірмей...