Өлеңдер ✍️

Алматы облысына арнаймын
Тербейді, жұртым, тағы да
Туыңа таққан ұлы орден.
Қуанған мынау шағыңда
Қуатын сезбес кім оның!
Ырзамын өзім ерекше
Еңбегі мерей ел саған.
Ежелден тек сол емес пе
Жеріңді жаннат жасаған?
Атағың, даңқың ел сенің
Тұр ма екен тауда, түзде əлде?
Қандырып суға етегін,
Тоғытты ма екен құз əлде?
Құнары күшті өзенін
Ағытты ма екен мұзарттар?
Талдырмай жердің өзегін
Тасыды ма екен бұлақтар?
Солардың кілті, ерлерім,
Сендерде, бəлкім, тұр ма екен?
Төгілген күнде терлерің
Тоғытқан жерді нұр ма екен?
Қолыңда кілті жеңістің
Тұр екен, достар, қайсыңның?
Тілдесер олай жоқ ешкім,
Артық сөз ондай айтсын кім?
Осынау ұлы құрметке
Қоспаған кім бар үлесін?
Соншалық жылы жүрекке
«Бəріміз!..» деген бір есім.
Сондықтан сөзімді ағытып,
Жырлайын жұртым бəріңді.
Тауыңды түгел жаңғыртып
Шырқайын сүйген əніңді!
Сендердің сірə біріңдей
Сабыңда мен де өсермін.
Кеудеңде ай мен күнімдей
Жарқырай берсін қос орден!