Өлеңдер ✍️

Тарта бермей сусылдап,
Тоқта, Тоқташ, ағаңа.
Көз бен көңілім сусындап
Қарайын бір қалаңа.
Өзім көрген астанаң
Өз орнында десе де,
Секілдімін басқа адам,
Жаңа кірген көшеңе.
Өрілгендей өлеңнен
Суреттерге əуес ем,
Сəулетті үйлер көрем мен
Жəне биік, жəне əсем.
Таныс қала талайғы
Тамылжып тұр жасарып,
Сан құбыла қарайды,
Жан-жағымда жасанып.
Жаралысы ақ-жарқын,
Сəуле ойнайды жүзінде.
Жанарындай бау-бақтың
Мөлдірейді жүзім де.
Жылдар қосып сəн, сымбат
Құяды екен күш оған.
Сол бітімі тым қымбат,
Халқымызға ұқсаған!