Өлеңдер ✍️

Қыдырып Ленин көшесін
Аралап өтсең бұл кезде,
Көтерген биік еңсесін
Көресің үйлер мүлде өзге.
Көңілдегі елес болмаса,
Қалмапты сурет кешегі.
Сəулетті үйлер тамаша
Көркейткен сонша көшені.
Өңкей бір таспен көмкеріп
Өнерпаз жандар өрді оны.
Ауызда жыр боп кетерлік
Өмірдің бұл бір өрнегі!
Шенінде жүріп солардың
Сырына терең түсінсең,
Тынымсыз ісмер қолдардың
Танисың ұлы күшін сен.
Темір мен тасты бірге өріп,
Қиыннан қиып қалаған.
Не қилы мүсін түр беріп
Жасаған бəрін жаңа адам!
Өнерге солар тым жетік
Өзіне жанды қаратқан,
Жоғыңды түгел бар етіп
Секілді қолдан жаратқан.
Адамның бұл бір бақты деп
Қарайсың соған күнде ойлап.
Ғажайып үйлер сап түзеп
Алдыңда, əне, тұр бойлап.
Көсемнің ұлы тойына
Халқымыз тартқан сыйы бұл.
Жарасып көше бойына
Тұрады солар құйып нұр.
Солардан əсем үй алып
Қуанар қанша жүректер!
Биікте сонау ұялап
Талпынар қанша бөбектер!
Сəулетті үйлер өңшең бір
Елестер өнер шыңындай.
Жұртымыз да оны қастерлер
Ильичтің тартқан сыйындай!