Өлеңдер ✍️

Рақымжан десе, нағыз рақымшыл жан,
Бауырмал, жат-жаранды жақынсынған.
Ақ жарқын, әзілге бай ақынжанды,
Кезі жоқ кеуде қағып батырсынған.
Сырымды көкейіңе түйші, жігіт,
Рақаңды сүйсең, мендей сүйші біліп.
Мығымдар мырза мінез келеді екен,
Ол – дархан, көкірегі күйші жігіт.
Ел берсе ер ұлына мың қасиет,
Қастерлеп сақтай білу – ол да өсиет.
Сол қасиет жеткізді жеңістерге,
Қазақ бойын көрсетер сында сүйеп.
Жайпаған жанған отты шын арыстан,
Сені көрсем жарылам қуаныштан.
Рейхстагқа ту тіккен аңыз адам,
Кезім де жоқ басқаша сыр алысқан.
Кездессем таусылмас сыр үйем сеніп,
Еркелеп, сағыныштан сүйем келіп.
Соғыстан оралмаған өз ағамдай,
Жүремін мақтан етіп иемденіп.