Өлеңдер ✍️

Шошыма, достым, шошыма,
Күш қосармын қатар кеп,
Исатайдың қосына
Ту тіккендей Махамбет.
Есерден даңғыл қақ жолда
Не болар бағыт сұраған?!
Ескі доспен жат болма
Ирек жолда бұралаң.
Дарыны дархан жаралған
Мұхтарға да Абайым
Сонау алыс заманда
Төккен жоқ па арайын?!
Ақылдың кені тереңде,
Абайла, терең сұрыпта.
Кенесары дегенде,
Наурызбайды ұмытпа.
Ақтығын айтсақ бағалап,
Неге өтейін танымай;
Төле бисіз Сабалақ
Болар ма еді Абылай?!
Қаз дауысты Қазыбек,
Әйтекелер болмаса
Шұбырып, зарлап азып ек,
Үш биге бірлік қонбаса.
Тарихқа тағзым наз артты,
Өткені еске түседі.
Үш жүз түгіл, қазақты
Бөлуге жол жоқ үш елі.
Қай жүйеге жетсек те,
Бабалар жолын қорғаймыз.
Ақмолаға көшсек те
Алматыны ойлаймыз.
Көреген көңіл дәл ұғар
Сөздің оң мен терісін.
Есті дос пен ары бар
Білек қосам ел үшін.