Өлеңдер ✍️

Кел, домбыра, екеуміз
Сырласайық тағы да.
Тебірентер ме екенбіз
Күткендерді сағына?
Сыңар ішектеп қағытсам,
Қайтқан қаздай қаңқылда.
Тәтті күйді ағытсаң,
Ерермін баппен артыңда.
Біреулер жоғын сағынсын
Шымырлата шерткенде.
Жұқарған жүрек арылсын
Ащы-тұщы дерттен де.
Бір қуаныш, бір қайғы
Тыңдағанға әкелсін.
Кімге жұлдыз, кімге айды
Аспандағы әперсін.
Сүйсінем де шошынам,
Әуеніңе бой балқып,
Риза бол деп осыған
Тілдеседі күй қалқып.