Өлеңдер ✍️

Мен сені тым қатты сағындым,
Назды өлең жүректе көктейді.
Сау жүріп есімнен жаңылдым,
Түн неге тезірек өтпейді?
Аңсадым жүзіңді көргім кеп,
Шақырған жетті ме дыбысым?
Көзімді ілдірмес белгің көп,
Оятып жіберді тынысың.
Келер деп таңертең ертемен
Естідім амалым біткенде.
Махаббат отына өртенем,
Тез жетіп келмесең күткенде.
Өзгерді Алматы тағдыры,
Жер-көкке ақ көрпе жапқандай.
Қарлатты наурыз жаңбыры,
Терезе сен келіп қаққандай.
Ақындар шыдауды білмейді,
Кеудесі қаулаған сезім ғой.
Сағат та тоқтады, жүрмейді,
Мен сені сағындым дедім ғой.