Өлеңдер ✍️

Даналықтың қызықсам салтына бір,
Қарт Ұлытау төгілер атына жыр.
Отансүйгіш көтерген рухымды,
Өзі де бір көсем тау, даңқы да бір.
Ойнақтаған тау-бөктер кілемінде,
Салтанат бар көп киік легінде:
Ақ Шоқыны айналып өтіп жатыр
Білезіктей сұлудың білегінде.
Бауыр басқан таулардың көп легі,
Қарт Ұлытау – солардың төргі шебі.
Етегінен ғарышқа ұшқан кеме
Жетегінен шыққандай көрінеді.
Әлімсақтан Ұлытау алшақтайды,
Кен табылар қай жерден қазсақ сайды.
Жезқазғанға Құдайым қоса берді
Қаныш құмар Жезді мен Қарсақбайды.
Ұлытауда ертерек таң атады,
Кең даланы әудемде жаңартады.
Ұлылықтың шын сыры осы шығар,
Бабалардың ізіне қаратады.
Содан кеттің, Ұлытау, ән-жырым боп,
Ұларыңа арнаған жан сырым көп.
Етегіңе құрғанда жаңа ауданды,
Ат салыстым аянбай, бір ұлың боп.