Өлеңдер ✍️

Тұрмыстың не бір тәуірін,
Көлденең тартып алдыма.
Тауығыңды айтпа, бауырым,
Тауында қыран қалды ма?!
Інгенді айтпа боздаған,
Кетеді қайда қолдағы.
Қойынды айтпа қоздаған,
Қырында киік бар ма әлі?
Қоймаймын текке сұрауды,
Көңілде күдік бар мына.
Сиырыңды айтпа бұзаулы,
Сайында сусар қалды ма?!
Келіп ем демеп үмітті,
Шыққан жоқ сұлу қырға әлі,
Текеңді айтпа түбітті,
Таутеке таста жүр ме әлі?!
Демеймін бәрін мансұқта,
Ағаңның дайын ұқ мына.
«Жигули» маған таңсық па,
Жылқыңнан жүйрік шықты ма?!
Мәз болма інім, шайлыққа,
Орманды отқа бұтаса,
Үйдегі байлық – балық па,
Түздегі балық жұтаса?!