Өлеңдер ✍️

Беу, менің шағала құсым,
Сен әлі жағадамысың?..
Дерт екен сағыныш деген,
Жанымды жаралады шын.
Біреудің кер мінезіне,
Біреудің шелді көзіне
Болмысым үйлеспегесін,
Асығып келдім өзіңе.
Жақтырмай мына паң қала,
Қарайды құбақандана.
Барамын күрсінген сайын
Жат болып бұла таңға да.
Теңіздің толқыны сынды
Жүрегім толқып ұшынды:
Сол қызға ғашық болғасын,
Қоштасу – қорқынышым-ды.
Беу, менің шағала құсым,
Сен аппақ самаламысың?
...Бұл жалған өтер-ау бастан,
Зулатып сараң ағысын.