Өлеңдер ✍️

Жанымды үгітіп,
жаралап
Сенімге түсірме сызат түк!
Күдік пен
уайымды жағалап,
Тағы да бір күнді ұзаттық...
Арманым өзіңмен бір, егіз,
Өзіңсіз тарылар тынысым.
Болмашы нәрсеге күлеміз,
Сол сәтте-ақ
қаламыз ұрыссып...
Білемін,
өзімшіл жігітсің,
Менің де мінезім –
антұрған.
Сенімнің ақ жібін үзіпсің,
Айрылып
сабырлы қалпыңнан.
Мен сендік зәрумін
көмекке,
Мақтанам
серігім болғанға!
Айтшы енді,
қызғаныш керек пе,
Жүрегім
«сүйем» деп тұрғанда?!
Қызғандың....
Жара сап жаныма;
Болса да белгісіз себебі...
Мен сені
балаймын бағыма,
Өзгенің
жоқ түкке керегі.
Қызғаныш –
біз үшін долы сын
Сенімнің
қалқанын бұзғанға!
Мен сені сүйемін,
сол үшін
Өтінем,
сен мені қызғанба!