Өлеңдер ✍️

Қазақта малмен мақтанған,
Бай да көп бөскен, бағлан көп.
Əлемде аты сақталған,
Қажымұқандай палуан жоқ.
Қазекең күшін аңғарып,
Француз, жапон қарсы алған.
Орыстың өзі таң қалып,
Түріктің өзі тамсанған.
Қобыланды батыр аруағы,
Көтеріп жүрген беделін!
Маңдайға біткен саңлағы,
Қажеке, қандай Ер едің!
Талайлар жетпей, жанасып,
Ұстауға қолын соқтыққан.
Өзбек те жатыр таласып,
Өзінде палуан жоқтықтан.
Қажекең жатқан қыр, дала,
Шəкірттер өсті отты ізге.
Қажымұқан палуан бір ғана!
Əйтпесе, палуан көп бізде.
Əлемге мəлім Елінің,
Өлшемі сынды Қажымұқан.
Қоңырқай қазақ жерінің,
Бөлшегі сынды Қажымұқан!