Өлеңдер ✍️

Мінездеріңде дауыл бар,
Боран бар,
От бар,
Жауын бар.
Әр тілде мейлі жазса да,
Ақындар – қандас бауырлар.
Күміс де,
Жырды алтын де,
Жазады олар әр тілде,
Ақынның азап – рақатын
Бермейді тағдыр әркімге.
Құрметтеп ақын қауымын,
Бар елдің сүйем ақынын.
Назым да менің бауырым,
Тагор да менің жақыным.
Жырменен жаным жай табады,
Сырласам кейде түнімен,
Пушкинді тағы қайталап,
Руставелиге үңілем.
Табиғат - ана әркімге,
Сыйласын жырдың жарығын.
Жазғанмен олар әр тілде,
Мақсаты біреу бәрінің.
Мінездерінде дауыл бар,
Боран бар,
От бар,
Жауын бар.
Әр тілде мейлі жазса да,
Ақындар – қандас бауырлар.