Өлеңдер ✍️

Жырла, менің домбырам, жырла, кәне.
Шанағыңда елімнің тұнған әні.
Халқымыздың саздары, әуендері
Болашаққа сенімен бір барады,
Жырла, менің домбырам, жырла, кәне.
Сенің ішегің жалғаулы жүрегіммен,
Бір кетеді әуенің сүйегіммен.
Ең соңғы рет сүйгендей бұл өмірді,
Сенің сазды үніңді сүйемін мен.
Сенің ішегің жалғаулы жүрегіммен.
Жырла, менің домбырам, жырла тағы,
Қызығыңа кең далам бір батады.
Сенің ойлы жырыңа ормандар да,
Алып-алып таулар да тіл қатады.
Жырла, менің домбырам, жырла тағы.
Жырла, менің домбырам, сал домбырам,
Ұрпағына бабамнан қалған мұрам.
Өмір бойы мен сенің әуеніңнің
Ешқашан да өшпеуін арман қылам,
Жырла, менің домбырам, сал домбырам!