Өлеңдер ✍️

Дерт кемірді денеңді қызулы бір,
Сол дертіңді жаза алмай бұзылды жыр.
Сүйіп еді бір жігіт ерініңнен
Алаулатты алқызыл жүзіңді нұр.
Жасыл көктем көзіңді күлімдетті,
Он сегіздің ыстығы дірілдетті.
Бәрінен де бір безгек қалшылдаған
Іздеп жүріп өзіңе бұрын жетті.
Ал соныңды жігіттер бағалады,
Қыздар жағы қызғанып, табалады.
Жана бердің лапылдап жастығыңда
Тек сұлулар осылай жана алады.
Талайларды жүрдің сен тамсандырып,
Маған қара дегендей болсаң жігіт.
Жанарыңмен атқанды жалт еткізіп,
Матадың сен шашыңды арқан қылып.
Күз алмасы секілді үзіліп ең,
Мен де сені ұнатып бұзылып ем.
Бір рет те бұрылып қарамадың
Желігімен жастықтың,
Қызуымен.
Өткен күнге әрине өкіну көп,
Сезінуші ең өзіңді тотымын деп.
Енді білдім,
Жүріпсің әуре болып,
Махаббаттың жанбайтын отын үрлеп.