Өлеңдер ✍️

Сөндірген жоқ батар күн нұрын әлі,
Асау бұлақ арқырап,
Жұлынады.
Жаны ерке,
Бірақ та мінезі сол –
Жартастарға тектен – тек ұрынады.
Ештеңені қоймайды көнбесіне,
Шақырады жартасты белдесуге.
Тау ішінде дауысы жаңғырығып,
Жаны сыймай келеді кеудесіне.
Сай қуалап толқындар дүрсілдейді,
Салған әнін биіктен түсірмейді...
Еркіндікті аңсаған ер мінезін
Меңірейген жартастар түсінбейді.
Қазір көктем,
Сәулелі самала шақ,
Жасылданып дүние жаңарар сәт.
Жаны қалмай,
Бұлақтар жүгіреді
Кеңістікті,
Кең-байтақ даланы аңсап.