Өлеңдер ✍️

Қыздардың қолаң бұрымы,
Арудың әні – шат қылық.
Сыңғырлап күліп ғұмыры,
Ағатын едің аптығып.
Жарыса шығып жал-қардан,
Махаббатты арнап, жырды арнап.
Ауылға келсем алдымнан,
Шығатын едің бұлғаңдап.
Үніңнен тәтті жырларды ап,
Суыңа шұбат қанушы ем.
Аттансам тағы бұлғаңдап,
Шығарып жолға салушы ең.
Жағаңда өтіп мың күнім,
Жолықтым жақсы доспенен.
Жол жүрсем аққан сылдырың
Сөзің бе еді әлде «қош» деген.
Жүзінен жылу көрінбей,
Қалшиды неге қара шың.
Сылқылдап келген едің ғой,
Сыңсып қайда ағып барасың?!
Таусылды ма әлде төзімің,
Бір күннен бір күн тіпті ұста.
Мөп-мөлдір менің сезімім,
Ғұмырың қандай қып-қысқа.