Өлеңдер ✍️

Қ-а-ш-а-н...
Анам көшкелі басқа өмірге,
Жетімдіктен түзілді тас көңілге.
Көзіндей боп төрімде көрпеше тұр
Көзімдей боп бұлдырап жас көмілген.
Қызыл пүліш, көк пүліш, сарысы бар
Көрпешенің көз тартар әрі шығар.
Шет жағына ілмекпен салған өрнек
Сол заманның жазылған зары шығар.
Ақ шәйімен астарлап, бес елідей
Қойдың жүнін ханшаның төсегіндей
Тартқан екен, үстіне отырған жан
Сезінеді қызуын кешегідей.
Бар өнерін, мейірім, шапағатын
Салып тіккен, шөпшегі жата алатын
Сол көрпеге өтсе де жарты ғасыр
Жан анамның сезінем махаббатын.