Өлеңдер ✍️

Түнде мысық жылағаны жағымсыз,
Ондай кезде тартады әбден жаным күз.
Шырылдайды-ау тоңғанынан, жарықтық,
Құшағына алған кезде қар үнсіз.
Неткен қатал сықырлаған қыс, боран,
Зар айтады терезе де мұздаған.
Естігендей жылағанын сәбидің,
Менің-дағы жан-жүрегім сыздаған.
Қайтем енді, ақын- жүрек жыр құшты,
Қайтем енді, әке-жүрек мұң құшты...
Алматыда қаламыз деп...
Бес айлық
Ауыл жаққа жіберіп ек тұңғышты.
Балбөбегім қолында еді қарттардың,
Көңіліме нақ осы ғой артқан мұң.
Босаңдау жан босамайын мен қалай,
Естіп жатып сыңсығанын бақтардың?