Әңгімелер ✍️

«Бірде бір адам басқа ауылда тұратын бауырына бару үшін жолға шығады, ал Алла Тағала оған жолда кездесетін бір періштені жібереді. Ол адаммен жолда кездескенде: «Қайда бара жатырсың?»– деп сұрайды. Ол:

– Мен ана ауылда тұратын бауырыммен жолығуға бара жатырмын, – деп жауап береді. Періште:

– Онда мұқтаж шаруаң бар ма еді? – дейді.

Ол адам: «Жоқ» деп жауап береді.

– Мүмкін туыстығың бар шығар?

– Жоқ.

– Әлде саған өткен жақсылығы бар ма?

– Жоқ.

– Онда не үшін бара жатырсың?

– Расында, мен оны Алла Тағала үшін жақсы көремін.

Сонда періште:

– «Сен ол адамды Алла үшін қалай жақсы көрсең, Алла да сені солай жақсы көреді» деп айту үшін мені саған Алла Тағала жіберген, – дейді».

Дайындаған – Тұрар ТҮГЕЛҰЛЫ