Өлеңдер ✍️

Қайтемін күндерімді жылап өткен,
Көңілден көшіп жатыр тұман еппен...
Жас қайың – Жаратқанның жалғыз қызы,
Жасауы – жайма-шуақ мына Көктем!
Жүрегім – бүршік жарды қайың бала,
Енді сен, ей, Көңілім, уайымдама!
Арудың ауызынан шыққан сөздей
Маңайдан леп еседі мəйін ғана.
Жүрегім бүршік жарды...
Гүл ашқалы!
Бу мен бұлт ніл-аспанға ұласты əні.
Құс біткен құрақ ұшып қуанып жүр
Сүйінші бір-бірінен сұрасқалы.
Жүрегім бүршік жарды – Гүлдегелі!
Амалдың білінгелі бірдерегі.
Босанып дүниенің құрсауынан
Дөңгелеп дөңнен асып Күн келеді!..