Аңыздар ✍️

Жиренше өзі бір жаққа жолаушы кеткенде осы қатыны өліпті. Жиренше барған жолынан қайтып келіп, әуелі Жәнібек ханға жолығып отырғанда Жәнібек хан есіттірген екен. Мынадай түрде естіртті:

— Әкесі өлсе қайтеді екен, шешенім?

— Асқар тауы құлады десейші.

— Шешесі өлсе қайтеді, шешенім? — депті.

— Ағар бұлағы суалған есепті болады да.

— Ағасы өлсе қайтеді екен, шешенім? — дегенде:

— Оң қанаты қайрылған есепті дағы.

— Інісі өлсе қайтеді екен, шешенім? — депті.

— Сол қанаты қайрылған есепті дағы, — депті.

— Апа-қарындасы өлсе қалай болады, шешенім? — дегенде:

— Ұзын өрісі қысқарған есепті дағы.

— Қатыны өлсе қайтеді, шешенім? — дегенде, қамшысын екі бүктеп, шалт жүгініп, қамшысына сүйеніп отыр екен.

Қамшының сабы шарт етіп сынып, үзіліп кетіпті.

— Қатын өлсе қамшының сабы сынған есепті болады да, — депті. — Қамшысының сабы сынғанда қатыны өлсе, жай майы бұзылды. Жай майы бұзылған есепті болды дейін деп отыр едім, — дегенде, Жәнібек хан:

— Шешенім, олай болса өзіңіз айтқандай, қамшыңыздың сабы сынғандай жұмысыңыз болды-ау! — деген. Осылай есіттірген екен дейді. Қайдан білейін қасында жоқпын, мүмкін естіген құлағымның жазығы жоқ деймін....