Өлеңдер ✍️

Өзбектердің секілді жас еркесі —
Қызғалдақты қадап алған шөл төсі.
Самарқанның жібегіндей көз тартқан
Гүлстанның, нұрстанның өлкесі.
Шөл даланы шербет суға бөлеген,
Біз сіздерге алып келдік көп өлең,
Алып келдік қазақ Фархад сәлемін
Сырдария мен Ертіс суын бөгеген.
Жатқан жерде жалпақ тақыр, бурыл құм,
Өсті гүлдер бұрымындай сұлудың.
Біз сіздерге алып келдік сәлемін,
Қазақ қызы қара көзді Шырынның.
Бұл Гүлстан болған сенің арманың,—
Сайра бұлбұл, айнала гүл жан-жағың.
Жас қаладан мұнара сап үйренген
Өзбектердің тұрмын танып қолдарын.
О Гүлстан, о Гүлстан, Гүлстан,
Жұлдыз болып аспаныңа жыр ұшқан.
Шөл даланы желекке орап тастапсың
Алғыс саған, өзбек елі, туысқан!