Өлеңдер ✍️

Тыңда мені, жаңа қазақ-жауқыран,
Көңіл күпті, несін сенен жасырам.
Сатылатын дүниені айтпаймын,
Рух байлығын қалай саған асырам?

Жас қайыңға сұқтанбашы өтінем,
Балғын шыбық бой түзесін еркімен.
Нәзіктіктің құдіретін паш етіп,
Жүректерді шымырлатсын көркімен.

Сұқтанбашы аққу-құсқа киелі,
Өріс аз ба, тояттайтын жүйелі?
Тырнақ салсаң махаббатың піріне,
Адамзатқа кесепатың тиеді.

Ор қоянның ұшырмастан қылшығын,
Қырғауылдың шашып-төкпей ырзығын.
Қыз күйінде өткізейін мен саған,
Табиғаттың сатылмайтын тылсымын.