Өлеңдер ✍️

Өсірмеген. Мені әлі өшірмеген,
Бір қызбенен ісім бар шешілмеген.
Ат қоюдың айтулы маманы едім
Бүгін саған тағы бір есім берем.

Шыныменен тағдырың тылсым бе еді?
Жүрегіңнің естілді дүрсілдері.
Көрмегендей қарайлап жүрмін саған
Білмегендей сен аңдып жүрсің мені.

Миымда мың сұрақ тұр бермей тыным,
Тыныштыққа келгенде кедей түнім.
Мендегі махаббатты ұрлап алған
Тыңшыларды түсіндім не дейтінін.

Жүрсе дағы жолыма түспей жолы,
Сыр білдірмей сүйемін іштей оны.
Қайда жинап жатырсың бақытымды
Менің сезімдерімнің шпионы.