Өлеңдер ✍️

Тағдыр демеп сүрінгенді құлатпай,

Бақ береді жайқалтып жас құрақтай.

Базбіреуге тағдыр шіркін ғұмырды,

Қысқа берер құмға сіңген бұлақтай.

Кейбіреуге бәрін берер сұратпай,

Өмір өтер сырғып жылтыр сынаптай.

Ал біреудің дәм мен тұзы таусылып,

Ерте сөнер майы біткен шырақтай.

Талғамайды жасын алар, кәрісін,

Ұққан мұның адам бар ма, мәнісін?

Қара жерде тосырқамай қабылдар,

Жаралғандай адамзаттың тәні үшін.

Тағдыр ісін адам бар ма, түсінген?

Бірде ғұмыр, бірде ажал түсірген.

Бұл тағдырдың ісі ме әлде, әдейі?

Шым болаттай төске салып пісірген.

                   *    *    *                       

Пенде бар ма бақытқа ұтылмаған?

Басына бұлт қайғымен тұтылмаған.  

Дəм-тұз бітсе бір-ақ күн бұл ғұмырың,

Бұл ажалдан Қорқыт та құтылмаған.

Көз жеткізіп өмірдің жалғанына,

Көнеміз де тағдырдың салғанына.

Мәні кетер өмірдің, тағдыр ісін,

Салар болса адамның талғамына.

Еркін Оралбайұлы 9.08.2018