Өлеңдер ✍️

Тауып айтсаң орнымен сөз көрікіті,

Қиыспаған əр сөйлем сөзге іріткі.

Қазақ тілі сөзге бай, мəні терең,

Былықтырып қоспасаң өзге ілікті.

Заманауи терминді көз көріпті,

Түбірімен кей сөздер өзгеріпті.

Қазақ тілі өлетін күн де жақын,

Тоқтатпасақ енжарлық, төзбелікті.

Тілімізге жағымсыз без кіріпті,

Шалақазақ тіл бұзар ез бірікті.

Бұзылмаған сан ғасыр тілімізге,

Артық сөздер неліктен тез кірікті?

Асыл сөзбен билерім қыл қиыпты,

Бір-ақ сөзбен шешіпті, құн қиыпты.

Қазіргінің басшысы тілін білмей,

Өзі аударған балкондай қылтиыпты.

Шешеніне ертенің жұрт ұйыпты,

Үш тұғыр деп бүгінгі құрт құйыпты.

Ана тілде сөйлемей тұтығып жүр,

Болар деген басшылар жұртқа ұйытқы.

Хан болмаса ойлайтын қарашасын,

Кім көрсетер тіл- дінге арашасын.

Тілді бұзған орыс тіл аз болғандай,

Дүмшелер жүр тықпаштап арапшасын.

Еркін Оралбайұлы 9.04.2018.