Өлеңдер ✍️

Есімде əлі есімде,

Ұялаған төсімде,

        Ауылда өткен сонар күз,

Бала болып ойнаған,

Қызығына тоймаған,

        Арта қалған сонау кез,

Туған жерім ауылым, сағындырған,

Бала арман уақыты, сағым қуған.

Қой бойынан асатын,

Жұпар иіс шашатын,

        Көк шалғынды жайлауы,

Мөлдіреген бұлағы,

Қаулап өскен құрағы,

        Таудың əсем қойнауы,

Күміс бұлақ əн салып сыңғырлаған,

Әсем үні көңілден мұңды ұрлаған.

Малдар қайтып өрістен,

Қой жамырап көріскен,

        Ауыл кеші тамаша,

Көкке тойып құтырып,

Жарап алған жұтынып,

        Тай жарысқан таласа,

Малы қайтып  у-шу болған айнала,

Ұмыта алсын осы кешті  қай бала?

Құлын шауып шұрқырап,

Ізінен шаң бұрқырап,

        Жаңа босап желіден,

Абыр-сабыр төңірек,

Сиырлар тұр мөңіреп,

        Сүт сорғалап желіннен,

Сиыр сауған əйелдер күмпілдетіп,

Бұрқыратып көбігін кілкілдетіп.

Ымырт түскен кеш шақта,

От лаулайды ошақта,

        Қазан астын кезек сүйіп,

Таба шоқта нанымен,

Кешкі астың қамымын,

        Əйелдер жүр тезек үйіп,

Қоңырсыған түтін иісі, естен кетпес,

Сағынбастан ауылын ешкім өтпес.

Еркін Оралбайұлы  6.04.2018