Өлеңдер ✍️

Жанарыңнан айналдым әлі тұнық,

Уақыт сені жеңбепті «кәрі» қылып.

Сынағына сес бермей тұрғансың-ау?!

Мыңдайыңды кетіпті әжім сызып.

Көңіліңнен теңіздей тербетілген,

Тек мейірім көремін келбетіңнен.

Махаббатың жүрекке қалай сыйған?!...

Үлкен болып тұрса да жер бетінен...

Анашым-ай,

Қамқоршым, ақ бұлағым!

Болашаққа бастайтын таң шуағым,

Таулы, қырлы бәйгіге атой салып,

Ақ сүтіңнен нәр алып шапқыладым.

Ақша шашың өткеннің елесіндей,

Ақ орамал намыстың белгісіндей.

Ұл-қызыңа ақ тілек дұға етер,

Ақ көңілің адалдық кемесіндей.

Сәжде қылып Аллаға бүгіндері,

Намаз оқып құлшынған көңілдегі.

Неде болса,

Жәннатқа кір Анашым,

Құлшылығың қабыл боп өмірдегі.