Әңгімелер ✍️

Ел, жер, ер. Құдіретті үш ұғым. Қасиетті үш таған. Өйткені Ел құдіретті. Жер киелі, Ер қасиетті болмақ. Киелі топыраққа кіндік қаны тамған ардақты азаматын Елі алақанында аялайды. Сондықтан киелі Жердің қасиетті Ері Елін құдіреттендіреді.

Бүгін еркін елі еңіреген Ерін киелі топырақты туған Жерінде қайта туғызып отыр. Ол -елдің еріне деген өтелген борышы. Ол - елінің асыл ұлына деген сүйініші. Ол - елжіреген елінің Азамат қаламгеріне, қайраткер қаһарманына деген үзілмес, өшпес махаббаты!

Өйткені Ғабит аға Мүсірепов елін сүйгендіктен ғана, ұлтын ардақтағандықтан ғана қайраткер болған. Кенжелеп қалған қазағын кеуделетіп ілгері ұмтылтқан көшбастаушы болған. Білім-ғылымға талпынтып, өнер-мәдениетке жеткізу үшін қаламгер болған.

Ғабең ірі тұлға еді. Ескінің тозығын бұзып жаңаның озығын халқына ұстату үшін республика мәдениетінің тұтқасын ұстады. Сол үшін біз оған борыштар едік.

Ғабең паң асқақ еді. Отарлық езгінің шырмауындағы ұлтына тәкаппар қайсарлық, еркіндікке деген өжет сенім егу үшін де өршіл рухын барынша тік ұстады. Сол үшін де біз оған борыштар едік.

Ғабит аға сырбаздық үлгісі еді. Елінің нәзік жаны, ғажап сырының белгісіндей етіп өз көкірегінің әсем назын әсерлі әңгімелерімен, сыршыл пьесаларымен, ғажап романдарымен халқына таратып еді. Сол үшін де біз оған борыштармыз.

Ғабит аға әділдік пен тазалықтың өнегесі де еді. Қиракезік заманының дүлей дауылының өтінде қасқайып қарсы жүріп, иілсе де сынбай, сүрінсе де жығылмай, әділет туын шайқалтпай алып өткен. Ол айтысса да Мұхаңды, Әуезовты, Сәбеңді, Мұқановты қатты сыйлаған. "Бейімбет халық жауы болса, мен де халық жауымын!" деп қасиетінен айнымай, Майлинді ерекше құдірет тұтқан. Сол үшін де біз оған борыштымыз.

Ғабең күрескер еді. Голощекиннің қанды қырғынына қарсы батыл айқасқа шығып, "Бесеудің хатын" жазып, қазағының тозағын тоқтатпаққа барынша күш салған болатын. Сол үшін де біз оған борышкер едік.

Міне, киелі топыраққа ұлы Ғабеңнің бүгін кіндік қаны қайтадан бір тамғандай. Жүз жылдан соң тәуелсіз елінің төрінде өз шілдеханасын өзі тамашалап отыр. Жер киелі дегенім осы. Ұлы перзентін екінші рет туғызып отыр. Ер қасиетті дегенім осы. Дүниені түгел дүбірлетіп: "Бірігіңдер! Іріленіңдер! Көбейіңдер! Көркейіңдер!" деп тойына шақырды. Ел құдіретті дегенім осы! Ұлан даласында ұлан баласына - ұлы данасына мәңгілік орын берді. Ендеше Ел де, Жер де, Ер де мәңгіліктің өзі. Осы үш таған ұғым біріккен кезде әлем-болмыс ешқашанда ірімейді.

Тойларың құтты болсын аяулым, ардақтым, асқар белім - Туған халқым! Ұлы Ғабеңнің ұрпақ, жерлестері!

2002 жыл