Өлеңдер ✍️

Нұр себелеп, жып-жылы түн аунады.

Құдай осы дұғаңды құп алғаны.

Таң атады талықсып амалы жоқ,

Бұл пәнидің қашанғы тұрар бағы.

Самал есті қадірлі таңға қарай,

Ең ұзақ түн дәл бүгін болмағаны-ай,

Мен отырмын балконның жиегінде,

көз жіберіп, тым-тырыс жолға қарай.

Таң атады, түн ауып, күн шығады.

Жадыратар жайқалып нұр, шуағы.

Кешір Алла күнәмді дегеніммен.

Жаным бірақ әлі де тыншымады.

Жылында бір кешірім сұрай қалып,

Ұмытамыз ертең-ақ құдайды анық.

Күн шыққанда күнәдан тазарғандай,

Тәтті ұйқыға кетеміз құлай барып.