Өлеңдер ✍️

Сағынышты жүрегімнің назындай,
Қырдың әсем қалқып ұшқан қазындай,
Сырлы әсем Сырдария сазындай,
Аңыраған аққулардың мұңындай
Анасынан айырылған құлындай,
Алатаудың аппақ ойлы шыңындай
Қазағымның,
Қазағымның күйлері-ай!
Жеті өзендей Жетісудай салалы,
Сарыарқаның самалындай самалы,
Дүрілдетіп тебіренткен даланы,
Бабамыздың күңіренген зарындай,
Жайығымның жайлап аққан жанындай,
Даламыздың қайнап аққан қанындай,
Қазағымның,
Қазағымның күйлері-ай!
Сексеуілдей қатып-семген сенімдей,
Бедірейгеп бетпақдала шөліндей,
Бала жанар Балқашымның көліндей
Қонағымдай келіп қалған күтінбей,
Жүректерден жаратылған бүтіндей,
Анамыздың уыз дәмді сүтіндей,
Қазағымның,
Қазағымның күйлері-ай!
Сай-сүйекті сырқыратқан төзімдей,
Қайта оралмас махаббаттың көзіндей,
Қайталанбас қимас асыл сезімдей,
Толқытады теңіз-мұхит тасқандай,
Алдыңыздан арман елік қашқандай,
Құпиясы шексіз-тылсым аспандай,
Қазағымнын,
Қазағымның күйлері-а й!
Қатты мұңы көктен түскен жасындай,
Сырлы мұңы — таудың тілсіз тасындай,
Ащы мұңы көздің кермек жасындай,
Қасіретті қос ішектен құйылған,
Күмбірлесе күллі дүние ұйыған,
Тәңіріме сыйынғандай сыйынам,
Қазағымның,
Қазағымның күйлері-ай!