Өлеңдер ✍️

Бөліп тұрған екі қоғам, екі елін,
Сіз білесіз шекараның ңе екенін.
Сіз білесіз қатысы жоқ бейтарап
Екі араның не екенін?
Тұлпар мініп шапсақтағы ерттеулі,
Қалаймыз біз ізетті аттап өтпеуді.
Жеке-жеке өз алдына бір-бір ел,
Адамда да шекара бар шектеулі.
Жағалауға шығып қалған жайындай,
Құлап түсіп, сұлап жатар қайыңдай.
Адам болса шекарасын ұмытқан,
Жақсы-жаман екі арасын айырмай.
Үлкендерді қастер тұтып мақтанам,
Кіші болып екі араны сақтағам.
Жолын кесіп жолай өткен жоқ күнім,
Аға-іні шекарасын аттаман!
Бөліп тұрған екі қоғам, екі елін,
Сіз білесіз шекараның не екенін.
Сіз білесіз қатысы жоқ бейтарап,
Екі араның не екенін?
Ізеттілік-іздегенге тапшысы,
Қонса-дағы басыңызға бақ құсы.
Бұл өмірде бола білген жақсысы,
Азаматтық шекараның сақшысы!