Өлеңдер ✍️

Осынау торғай кішкене

Төсіне көктің байланып,

Айналып құйттай нүктеге,

Әуенге мөлдір айналып.

Жырлайды туған даласын –

Ұясын, балапандарын.

Сол ма деп таң да қаласың

Атырған дала таңдарын!

Мен де бір құйттай торғаймын,

Сүйемін Отан-Анамды.

Тоқсан да тоғыз толғаймын,

Жетпейді үнге бәрі әлгі!

Не айтсам да аздай көрініп,

Лайық теңеу таппадым.

Үн тұрды тағы төгіліп,

Ағарып атты ақ таңым.

Бақытым болған, Отан-ай,

Жырлай алмауым ұят-ты.

...Шырылдап тұрған сол торғай

Жүрегім менің сияқты!