Өлеңдер ✍️

Толқынды толқын қуалап,

Жағаға келіп жоғалды.

Жаңадан бірі туа қап,

Түйіліп қайта оралды.

Кемерін жардың ұрады,

Жағадан асып кете алмай.

Әнеки, тағы құлады

Мақсатына ол жете алмай.

Толқындар – асау арғымақ,

Тулайды шаршап-шалдықпай.

Өмір де – аққан бал бұлақ,

Келеді уақыт қалғытпай.

Басымда – ойдың орманы,

Теңіздерім бар, өртім бар...

Өлеңнің болды жолдары –

Кеудемді ұрған толқындар.

Өлеңнің оты өшпеді,

Қан тамырымда солқылдар.

Жүрегіне елдің жетсе еді

Жүректен шыққан толқындар!