Өлеңдер ✍️

Дауылдар соғып, жұлқылай берсін жел мені,

Қайғысыз, мұңсыз көңілді күйлер тербеді.

Махаббаттардан ойлануға да мұршаң жоқ,

Ішпей-ақ масаң асау көктем бас бермеді.

Өзіңмен өзің қалғаннан жаман жоқ екен,

Дос-жаранды ойлап көзімнің жасын көл етем.

Ұйқым да қашып, күлкім де қашып күні-түн,

Қимастарымды қиялымда тек тербетем.

Бұтақтарым мен жапырақтарым тоналды,

Күз келгелі бұл өмірім мұңды боп алды.

Жарқылдап күлген, қасыңда жүрген асылдар –

Аспан мен жерде жүлдыздар қанша жоғалды?!

Жүрегім болып есігімді олар қағады,

Көзімді жұмсам, бәрі кеп қоршап алады.

Өткенімді ойлап, жеткенімді ойлап, қамығып,

Түндерім енді ұйқысыз өтіп барады.