Өлеңдер ✍️

Жүріппін қарын қамы, бас қамында,

Сағындым құмдарын да, тастарын да.

Бұл күнде елеусіз де, елсіз мекен

Аңсарым ауып отыр Ақшақұмға.

Көп жайды аңғармайсың жас шағыңда,

Бәрі айтқан – дүние өтті қас қағымда.

Бүр жарып сол мекенде әкем өскен,

Бір барып қайтсам еді Ақшақұмға.

Ішім де, астаң-кестең аспаным да,

Алпыстың көрем ертең асқарын да.

Бабалар бейітіне құран оқып,

Барғаным дұрыс еді Ақшақұмға!

Бабамның жастық шағы – жас талында,

Анамның ақ шәлісі – аспанында,

Аяулы атамекен Ақшақұмда

Айналып кетсем, шіркін, ақ сағымға!..