Әңгімелер ✍️

– Ей, Аллаһ, бір ғана тілегім бар. Сен ағайындыларды қырқыстыруды адам атадан-ақ өзің бастадың. Сол үшін де адам атаның үлкен ұлы Қабыл інісі Әбілді өлтірді. Сол жауыздық жер бетінде әлі жалғасып келеді. Сен оларға ойлануға уақыт бермедің. Күнәсінен тиылуға орай жаратпадың. Егер тілегімді қабылдап, уақытты кері шегерсең, олар қатесін танып, түзелер еді, жер беті жауыздықтан тиылар еді!

Бұл адам атаның шөпшектерінің өтініші еді.

Ғасыр өз бұйдасын қанша жыл кері тартты, оны ешкім аңғармады. Алла адам әулетінің тілегін мақұлдаған болатын.

Қабыл әуелгісіндей жер жыртып, егін салса, Әбіл мал бағатын. Ол інісі Әбілдің                 тірі жүргеніне қайран қалды. Әрі оның қарындасына баяғыдай ғашықтығын көргенде ақылын ашуға жеңдірді. Әуелгі сөзін қайталап:

– Сенің менің қарындасымды алып бақытқа кенелуіңді, өзімнің азапқа қалуымды қаламаймын. Сені сөзсіз өлтіремін – деді. Әбіл де бұрынғы сөзін қайталады:

– Аға, өйтіп күнәһар болмаңыз, райыңыздан қайтыңыз, Алладан кешірім сұраңыз. Олай болмағанда көресіңізді көріп, тозақтың отына күйесіз. Арамдық атаулы жазасыз қалған емес! – деді.

– Егіздің сыңары болса да асқан сымбатты аяулы қарындасымды өзім алмай саған беріп бұл дүниеде өртенгенімнен о дүниеде өртенгенімнің өзі жақсы! Осыны айтқан Қабыл Әбілге тап берді.

Амалы таусылған Әбіл баяғыдай өлімге басын ұсынбай, тұра қашты. Мүмкін Қабылдың тәубасы есіне түссе райынан қайтар деп үміттенді. Әрі адамзат дүниесінің кейінгі мысалын көрсетпекке қабірлер үстімен ұшты. «Ромео мен Жульетта», «Ләйлі мен Мәжнүн», «Қозы Көрпеш пен Баян сұлу», «Қыз Жібек пен Төлеген», «Еңлік пен Кебек» кесенелерінің қасынан да өтті.

Сағым дүние жердің бетінен неше аунады.

Әбіл қашып келеді. Қашып келеді...Ағасынан әлі де күдер үзбеді.

Қабыл болса соңынан бір қалатын емес. Көзіне Әбілден өзге ештеңе көрінбейді. Ол інісін өлтіретіндігіне сенімді еді.