Өлеңдер ✍️

Анау жақта бір ауыл бар, алыста,
Ол да біздің өз ауылымыз болады.
Қай кезде де құшағы ашық арысқа,
Қай кезде де үзілмейтін қонағы.
Анау жақта үй бар, бізден жырақта,
Ол да біздің өз үйіміз болады.
Арнап барып, жатпасақ та бір апта,
Өз үйіміз десең көңіл толады.
Анау жақта бір дауыс бар тым алыс,
Ол да біздің өз даусымыз, естісең.
Сыр бөлісіп, болмасаң да жұбаныш,
Сол дауысқа сыйлап, ізет етші сен.
Анау жақта тау бар, қарлы басына
Бұлт қонған, ол да біздің тауымыз.
Шықпадым деп шыңдарына жасыма,
Жетпейді ме аса алмаса жауымыз.
Анау жақта жол бар бізге беймəлім,
Ол да біздің жол болады түбінде.
Аспан астын тербегенде кейде əнің,
Салтанатты үн қосатын дүбірге.