Спорт жұлдызы. Қазақ тілі, 6 сынып, қосымша материал. 3 сабақ

Денис Тень

https://kk.wikipedia.org/wiki/%D0%94%D0%B5%D0%BD%D0%B8%D1%81_%D0%AE%D1%80%D1%8C%D0%B5%D0%B2%D0%B8%D1%87_%D0%A2%D0%B5%D0%BD

Денис Тень туралы қызықты деректер

https://massaget.kz/layfstayl/sport/tulalar/43988/

 Қазақстандағы мәнерлеп сырғанау өнерін дамытып жүрген Денис Тен елімізде өтіп жатқан Универсиада ойындарында күні кеше елімізге оныншы алтын медальді сыйлады. Спортшы туралы деректерге қаныға отырыңыздар. Денис Тен 1993 жылы 13 маусымда Алматы қаласында дүниеге келген. Қазақстандағы ең бірінші әлемдік додаға қатысқан мәнерлеп сырғанаушы. 2013, 2014, 2015 жылдары Астана және Алматы қалаларында Қазақстанда ең алғаш рет мұз үстінде сырғанаудан шоу ұйымдастырған. Оған шетелдік мәнерлеп сырғанаушы жұлдыздар қатысқан.

 Денис Тен мәнерлеп сырғанауға келмей тұрып түрлі жолдан өткен, акробатика, жүзу, теннис, каратэ, таэквандо, би, көркем сурет үйірмесі, хор, музыкалық мектептерге барған. Ол спортшы болмаса, музыкант болар еді. Ата-бабасы Кореялық болған. Атасының атасы Минг Хен-Ко Жапониядан азаттық алар тұста Корей әскерінің генералы болған.

 Анасы бүкіл өмірін Денис Тенге арнаған жан. Мамандығы скрипкашы болса да, уақыт өте келе мәнерлеп сырғанаушыға айналған. Кішкене кезінде сырғанайтын жер болмағандықтан даладағы мұзда жаттыққан. Мұзға деген махаббаты күннің суығына қаратпады. Анасы 4-5 қабат киім кигізсе де, қырыққабат сияқты сырғанай беретін болған.

 Бір кездері спорт үшін отбасы екі жақта бөлек тұруға мәжбүр болған. Денис анасымен Мәскеуге көшеді, ал ағасы әкесімен Алматыда қалады. Қазақ тілі курсына қатысып жүр.

 Қазақ тілін білмесе де, Қазақстанның нағыз патриоты. Өзгелер Қазақстанды танымағанына өте намыстанып, елді танытуға күш салып жүр. Оны басқа шетелдегілер фамилиясымен емес, "Қазақ Денис" деп атайды. Аяқ астынан жолы болып, Ресейдің де, Американың да атақты жаттықтырушыларынан сабақ алған.

Аққан жұлдыз. 25 жасында өмірден өткен Денис Тен туралы не білеміз

Денис Тен 1993 жылы 13 маусымда Алматыда дүниеге келді. Ұлты – корей. Тен Корея империясы кезінде генерал болған танымал Мин Гын Хоның ұрпағы.

Мәнерлеп сырғанаумен 6 жасынан айналыса бастаған. Ол бұл спорттан бөлек теннис, тхэквондо, карате, жүзу, акробатикамен айналысып, би мектебіне барған. Музыка мектебінде фортепиано және хорда ән айту бойынша 5 сыныбын тәмамдаған. 2002 жылы Денис Тен ән айтқан ұжым Пусанда өткен зор Олимпиадасында күміс медаль иеленген. Осы кезде оның алдында не хорды, не мәнерлеп сырғанауды таңдау керек болды. Тен екіншісін таңдады.

2003 жылы «Хрустальный конёк» турнирінде оны Елена Булянова байқап қалып, Мәскеуге шақырады.

Денис 12 жасында Қазақстан чемпионы атанды. Жыл өткен соң Нидерландыда жасөспірімдер арасында өткен жарыста 10-орын алды. Бұл ол қатысқан ең алғашқы халықаралық жарыс еді.

Спортшы карьерасы басталған кезде әртүрлі елде өткен Haabersti Cup, жасөспірімдер Гран-приі, Dragon Trophy, Ресей Кубогы, Four Continents Figure Skating Championships секілді танымал жарыстарда бақ сынады.

Ол 2009 жылы әлем чемпионатына алғаш рет қатысып, үздік он мәнерлеп сырғанаушының қатарына кірді. Осылайша ол 2010 жылы Ванкуверде өтетін қысқы Олимпиада ойындарына жолдама алды. Ерлер арасында ең жас спортшы атанған ол алғашқы Олмипиадасында 11-орын алды.

Жыл өткен соң Денис бапкерін ауыстырды. Елена Буляновадан Юрий Гуськовқа кетті. Содан кейін америкалық бапкер Фрэнк Кэроллдың командасында жаттыға бастады.

2011 жылы Қазақстанда өткен қысқы Азия ойындарында Денис Тен алтын медальға ие болды.

Келесі маусымда ол Америка мен Канадада өткен Гран-при кезеңдерінде 5-орыннан көрінді. Golden Spin of Zagreb турнирінде екінші орын, ал Istanbul Cup-та алтын жүлдеге ие болды.

2011-2012 жылғы маусымда ол Қазақстан үшін жасөспірімдер арасында әлемдік жарыстан алғаш рет кіші қола медальға ие болды. Дәл осы жылы үшінші рет Қазақстан чемпионы атанды.

Жыл өткен соң Денис Тенді бүкіл әлем таныды. Ол мәнерлеп сырғанаудан өткен әлем чемпионатында күміс медальға ие болып, Қазақстандағы осы спорт түрінен жүлде иеленген алғашқы спортшы атанды.

2013 жылдан бастап спортшы «Денис Тен және оның достары» атты мұз айдындағы шоуға продюсерлік етті.

2014 жылы мәнерлеп сырғанаушы екінші Олимпиадасына қатысты. Сочиде өткен төрт жылдықтың басты додасында бабында тұрған Денис қола медальға ие болып, мәнерлеп сырғанаудан Олимпиада жүлдесін иеленген Қазақстан тарихындағы алғашқы спортшы атанды.

2014 жылы мамырда Тен Қазақ спорт және туризм академиясын қызыл дипломмен аяқтап, ҚБТУ-ға оқуға түсті. Егер тірі болғанда биыл оқуын аяқтап, диплом алар еді...

2014-2015 жылғы маусымда Денис төрт құрлықтың чемпионы атанып, Гран-при кезеңінде 3-орын алды. Ал айтулы дода әлем чемпионатында қола медальға ие болды.

Денис Тен фотоға түсірумен әуестенген. Ол әлеуметтік желіде өзінікінен бөлек парақша ашып, сол жерге туындыларын жариялап тұрды. Денистің объективіне ілінген танымал тұлғалардың арасында Динара Бақтыбаева, Айсұлу Әзімбаев, Әлия Телебарисова, Сабина Алтынбекова, Серік Сәпиев және тағы басқалар бар.

Денис Теннің қаншама елде жанкүйерлері бар. Тіпті Қазақстаннан бөлек, Корея, Жапонияда фан-клубтары жұмыс істейді. 2015 жылы күзде Жапонияның премьер-министрі Синдзо Абе Қазақстанға ресми сарапында Денис Тенді қос ел арасындағы достық символы деп атаған болатын. Денистің шоуына әлемнің түкпір-түкпірінен жанкүйерлері келеді. Тіпті Қазақстанда өткен шоуға Жапониядан 500 жанкүйер келді деген ресми дерек бар.

2017 жылы Алматыда өткен Универсиадада Денис алтын жүлдеге ие болды. Гран-при кезеңдерінің бірінде күміс медаль алды. Аяғындағы жарақатқа қарамастан биыл Оңтүстік Кореяның Пхенчхан қаласында өткен қысқы Олимпиада ойындарына қатысты.

Денис Тен қайырымдылықпен айналысты. 2014 жылы Астанада өткен шоуда жиналған ақшаны нейролейкозбен ауыратын кішкентай Нұрсат Жақыпбайға аударды. Сондай-ақ ол Қазақстанның әр өңірінде кішкентай мәнерлеп сырғанаушыларға арнап тегін мастер-класстар өткізіп тұрды.

Денис ерлер арасында бильман атты қиын элементті жасай алатын санаулы спортшының қатарына кіреді.

Ол Алматы қаласында 2020 жылы олимпиаданы өткізуге арналған Қазақстан кампаниясының елшісі атанды.

Ол туған елін әлем тануы үшін қолдан келгеннің бәрін жасады. Ол бар-жоғы 25 жасында Қазақстанға әлемдік жарыстарда қаншама медаль сыйлады. Ол бірнеше рет мәнерлеп сырғанау спортындағы әлем танитын жұлдыздарды Қазақстанға әкелді.